Mabiya mazhabar shi’a ne ke da masallaci mafi girma a Amurka
Kamfanin dillancin labaran iqna ya habarta cewa, cibiyar muslunci ta Amurka ita ce masallaci na biyu mafi dadewa a kasar Amurka bayan masallacin Asr al-Jadeed, wanda aka bude a shekara ta 1924 a birnin Michigan na kasar Indiana.
Cibiyar Musulunci ta Amurka ta samo asali ne tun a shekarar 1963, amma an bude masallacin na wannan cibiya a shekarar 2005. Tare da yawan al'ummar Shi'a na Larabawa (mafi yawan 'yan Iraki da Lebanon), ana kiran Dearborn zuciyar Musulunci, musamman ga 'yan Shi'a a Amurka.
Cibiyar Musulunci ta Amurka tana a 19500 Ford Street a Dearborn.
Dalilin gina wannan cibiya ta addinin musulunci ya samo asali ne sakamakon bukatar musulmin yankin Detroit a tsakiyar karni na 20, wadanda suke neman shugaban addini daga yankin gabas ta tsakiya da zai yi wa al'ummarsu hidima. An gayyaci Hamad Javad Shari daga kasar Lebanon domin ya jagoranci sabuwar kungiyar Islamic Center Foundation, wadda daga baya ta zama cibiyar Musulunci ta Detroit, daga baya kuma ta zama cibiyar Musulunci ta Amurka.
Cibiyar ta fara bude kofofinta ne a wani wuri a Detroit a ranar 20 ga Satumba, 1963, tare da tallafin kudi na al'ummar yankin, wadanda suka yi alkawarin gidajensu a matsayin jingina tare da kyauta daga shugaban kasar Masar na lokacin Gamal Abdel Nasser. An sayi filin gina masallacin ne daga Kamfanin Motoci na Ford.
Cibiyar Musulunci ta Amurka ta koma inda take a yanzu akan titin Ford a Dearborn a cikin 2005. Tsohon wurin yanzu ana kiransa da cibiyar Al-Zahra kuma har yanzu ana amfani da shi azaman wurin sallah.
Masallacin yana dauke da makarantar Muslim American Youth Academy (MAYA), makarantar islamiyya mai zaman kanta a matakin farko da sakandare. Cibiyar Musulunci ta Amurka ta hada da dakin taro, kicin, dakin sallah da mezzanine na mata, ofisoshin gudanarwa da dakin karatu.
